Gipasidunggan ug gihatagan og insentibo ni Mayor Kristine ug sa City Government ang mga mananaug sa SUGBUsog, usa ka programa sa Cebu Provincial Government ubos sa inisyatibo ni Gov. Gwen Garcia.

Gihimo ang kalihokan didto sa Purok Sitio Bonbon, Inayagan. Ang maong Purok ang nakakuha sa 2nd place sa SUGBUsog Provincial Level. Duha ang nakadaug sa provincial level ug 8 sa city level.

Ang pagpasidungog pahalipay sa pagpakita sa mga Nagahanon sa kamahinungdanon sa pagpananom. Nahasubay usab kini sa rekomendasyon sa City Task Force New Normal alang sa dugang paglambo sa komunidad.

Gani, ang pagpananom/ backyard gardening sa matag panimalay nakita nga pamaagi nga masulbad ang kakuwang sa pagkaon ug nutrisyon panahon sa mga katalagman ug emergensiya sama sa nasinati nato karon nga COVID-19 pandemic.

Sa lahing bahin, hatagan usab sa City Government ug insentibo ang kapin sa 70 ka mga Nagahanon nga nisalmot sa SUGBUsog isip pasalamat sa ilang partisipasyon niining dalaygon nga programa.

Gikalipay sa City Government ang partisipasyon sa mga taga-Naga sa SUGBUsog ug gidasig ang mga ni-apil sa pagpadayon sa ilang backyard gardening isip kabahin na sa ilang inadlaw nga panikaysikay.

Mala-umon si Mayor Kristine nga mas daghan pa ang mo-apil SUGBUsog 2nd Round.

Mag-backyard gardening na kita Nagahanon!