Pag Mayo 29, 2026, usa ka madasigon ug mabulukong kasaysayan ang gisaulog sa atong dakbayan dungan sa paghanduraw sa National Flag Days.
Malampusong gipahigayon ang 1st City of Naga Flag Retirement Ceremony. Kini nga seremonya usa ka sagradong tradisyon diin ang mga karaan, ginamit ug gisi na nga mga Philippine Flags gisunog uban ang labing taas nga pagtahod ug dungog.
Imbis nga ilabay lang bisan asa, ang pagsunog sa mga karaan na nga flag maoy husto ug subay sa balaod (Republic Act No. 8491) nga pamaagi aron mapreserbar ang dignidad sa simbolo sa atong kagawasan, kahiusahan, ug garbo isip mga Pilipino.
Gipangulohan ang maong kalihokan sa atong mga opisyal sa dakbayan pinangunahan sa mga City Councilors, Hon. Junjie Navales Cruz, Hon. Letty Abangan, Hon. Domer Libor, Hon. Amy Lara, Hon. Tet Alinsonorin ug Hon. Ray Manabat.
Mitambong usab ang mga City Department Heads ug mga empleyado sa lokal nga kagamhanan sa pagpangulo ni City Administrator, Engr. Arthur S. Villamor.
Giduyogan usab kita sa mga representante gikan sa National Government Agencies, atong mga Uniformed Personnel (PNP,BFP, Coast Guard, BJMP), mga Veterans, ug ang sektor sa edukasyon nga nagkahiusa sa paghatag og pasidungog sa atong nasudnong simbolo.
Ang City Government mapasalamaton kaayo sa Professional Academy of the Philippines (PAP) ROTC Cadets ug Boy and Girl Scouts of the Philippines sa EXCEED Learning Center sa ilang dakong tabang atol sa seremonya.
Ang 1st City of Naga National Flag Retirement Ceremony gipasi-ugdahan sa City Tourism and Heritage Development Office (THDO).
Uban niining unang seremonya, gipamatud-an sa City of Naga ang walay pagka-papas nga pagmahal ug pagtahod sa atong kasaysayan ug kagawasan.
“Ang atong bandila dili lang usa ka panapton; kini mao ang kasingkasing sa atong nasod ug ang mithi sa atong pagka-Nagahanon.”
Agig pagtuman sa balaod ug pagpakita sa tiunay nga nasyonalismo, atong ipadayon ang paghatag og taas nga mithi sa atong nasudnong bandila.
