Gisugdan na sa City Disaster Risk Reduction and Management Office (CDRRMO) ang tulo ka adlaw nga Basic Life Support (BLS) ug Standard First Aid (SFA) Training alang sa mga representante gikan sa nagkadaiyang office sa City Government of Naga.
Ang maong training gitambungan ni Councilor Hon. Junjie Navales Cruz, Vice Chair sa City Disaster Risk Reduction and Management Council, aron ipadayag ang iyang pagpasalamat sa tanang mga representante nga mipasalig sa ilang panahon ug aktibong pag-apil sa maong training. Gipasalamatan niya ang ilang dedikasyon sa pagpalambo sa ilang kahanas alang sa mas epektibo nga pag-alagad sa katawhan sa dakbayan.
Ang maong training nagtumong sa pagpalig-on sa kahibalo ug kahanas sa mga empleyado sa hustong paghatag og unang tabang ug pagresponde sa nagkalain-laing emerhensiya. Pinaagi niini, mas andam ang matag departamento sa pag-atubang sa mga sitwasyon nga nagkinahanglan og dali ug husto nga aksyon aron mapanalipdan ang kinabuhi ug masiguro ang kaluwasan sa publiko.
Usa kini ka lakang sa padayon nga paningkamot sa City Government of Naga sa pagpalambo sa disaster preparedness ug pagpalig-on sa kultura sa ka-andam ug kaluwasan sulod sa lokal nga panggamhanan.
