Sa ngalan sa among mga kaubanan sa 5th Sangguniang Panlungsod: Vice Mayor Jingjing Chiong ug mga konsehales, atong pagtimbaya ug Bulahang Adlaw Mga Nagahanon!
Kining grabeng kainit nakamugna na ug grass fires ug kakuwangan sa supply sa tubig. Daghan usab mga nangasakit sama sa hilanat ug ubo sa mga bata ug tiguwang. Busa agi ug pagtubag sa panginahanglan sa katawhang Nagahanon, gipasar nato sa Sangguniang Panlungsod ang resolution nga nagdeklarar nga ang City of Naga anaa karon sa State of Calamity. Kini human nga ang City Disaster Risk Reduction and Management Council (CDRRMC) mirekomendar sa Sanggunian sa maong lakang.
Tumong sa declaration sa State of Calamity nga mas mapadali pa sa atong syudad, pinanguluhan ni Mayor Val Chiong, ang pagpatuman sa mga proyekto ug kalihokan nga makahatag kahupayan sa katawhan sama pananglit sa pagpalit ug dugong water tankers aron mas subsob pa ang pag supply nato ug tubig sa mga kumunidad, pagtabang sa kabumberohan panahon sa sunog, pagpalit ug mga tambal panagang sa sakit nga dala sa tumang kainit, assistance alang sa sector sa agrikultura, dugang social services ug uban pa.
Sa laing bahin, kusganon ang pagsuporta sa Sangguniang Panlungsod sa mga lakang nga ga-awhag sa Commission On Audit (COA), Bureau of Local Government Finance (BLGF) ug uban pang ahensya aron ma-recover ang Salapi sa Lungsod nga nawala diha sa opisina sa Treasury. Nakighiusa ang Bise Mayor ug mga Konsehales kang Mayor Val sa pagpasaka ug tukmang sumbong batok sa mga responsable, ingon man nga mabayran ang nawala nga salapi sa LGU, ug pag-improve pa sa sistema sa financial controls aron malikayan nga mahitaboan ang LGU pag-usab.
Isip katambayayong sa mga buhat pagpalambo, ilabi na alang niadtong labaw nga nanginahanglan sa serbisyo sa gobyerno, padayon nga nagdasig ang Sangguniang Panlungsod sa mga barangay sa pagpasar sa ilang budget. Andam kita nga mohatag tambag ug giya sa atong mga kaubang opisyales sa kabarangayan mahitungod niini.
Kon atong sumahon, ang atong mga kalihokan ning panahona pinasubay sa atong pangandoy ug paghatag katumanan aron ang NAGA ANDAM pagsagubang sa mga emerhensiya, katalagman ug uban pang pagsuway ug hagit sa kinabuhi. Kinahanglan gayud ang pag-inalagaray, pagtinabangay ug pakighiusa – mga pagtulun-an sa milabay nga Semana Santa, mga pagtulun-an nga makatabang sa mga Nagahanon, mga pagtulun-an nga makapahimo nga ang NAGA ANDAM.