Gipahigayon ganihang buntag sa Volley and Lob Covered Tennis Court ang City of Naga Purok General Assembly for the 1st Semester sa 2025 nga gitambongan sa 507 ka Purok Presidents sa Naga.
Ang Purok General Assembly gitambongan ni Mayor Val diin personal siya nga nihatag og mga updates apil na ang pagpasabot sa nagpadayon ug mga umaabot nga mga programa ug proyekto sa City Government.
Apil sa gihisgotan ni Mayor Val mao ang Solid Waste Management hilabi na ang No Single Use Plastic Policy sa City Government. Gihangyo ni Mayor Val ang mga Purok President sa padayon nga suportahan ug motabang usab sa pagpasabot sa ilang mga miyembro sa Solid Waste Management program sa City Government.
Nihatag usab og update si Mayor Val sa padayon nga construction sa Enan Chiong Mendiola Memorial Hospital, usa ka 150-bed capacity tertiary hospital nga ubos sa pagdumala sa City Government. Pipila sa mga amenities sa hospital ang 10-bed capacity Intensive Care Unit (ICU) ug laboratory services apil na niini ang X-ray, Ultrasound ug CT Scan. Nanghinaot siya nga ang hospital makahatag ug kalidad apan barato nga serbisyong medical alang sa mga Nagahanon.
Gipa-ambit sab ni Mayor Val ang usa sa bag-ong housing program sa City Government nga i-implement karong tuiga, 2025 . Sa maong programa, 200 ka mga beneficiaries nga labing nakinahanglan ug balay ang tabangan sa City Government. Ang City Government ang mopalit sa mga mga materyales sa balay samtang ang labor sa pagpatukod sa balay ipa-agi ug bayanihan diin tabangan kini sa komunidad ug sa barangay. Usa ka multi-sectoral selection committee ang umolon ni Mayor Val aron mao ang mo-screen ug mo validate sa mga beneficiaries.
Sa iyang panapos nga mensahe, gipasalamatan ni Mayor Val ang tanang purok sa ilang kanunay nga suporta sa City Government ug nanghinaot sa padayon nga kahi-usahan sa mga Nagahanon.
Ang City of Naga Purok General Assembly usa ka venue diin mahatagan og mga update ang mga Purok sa mga programa ug proyekto sa City Government ug makapadangat usab sila sa ilang mga issues and concerns sa matag Purok. Gi-facilitate kini sa City Information and Community Relations Department ubos sa City of Naga Purok Task Force pinangulohan ni Purok Task Force In-charge Ruth Bandola-Alensonorin.
Padayon ta Purok Nagahanon sa atong pagkahiusa para sa mas malambuong Naga!
